ଆଜିଠୁ ଯୁକ୍ତ ୨ ନାମଲେଖା ଆରମ୍ଭ , ସକାଳ ୯ରୁ ଅପରାହ୍ନ ୫ଟା ଯାଏ ହେବ ନାମଲେଖା

ଆଜି ଠାରୁ ଉଚ୍ଚ ମାଧ୍ୟମିକ ବିଦ୍ୟାଳୟ(ଯୁକ୍ତ୨ କଲେଜ)ରେ ନାମଲେଖା ଆରମ୍ଭ ହେବ। ପ୍ରଥମ ପର୍ଯ୍ୟାୟ ମେଧା ତାଲିକା ତଥା ମେରିଟ୍ ଲିଷ୍ଟ ଆଧାରରେ କଳା, ବିଜ୍ଞାନ, ବାଣିଜ୍ୟ, ଧନ୍ଦାମୂଳକ ଓ ସଂସ୍କୃତ ବିଭାଗରେ ନାମଲେଖା ହେବ। ଏହି ପର୍ଯ୍ୟାୟରେ ନାମଲେଖା ଲାଗି ୩ ଲକ୍ଷ ୪୭ ହଜାର ୬୨୬ ଜଣ ଛାତ୍ରଛାତ୍ରୀଙ୍କ ତାଲିକା ପ୍ରକାଶ ପାଇଛି। କଳା ବିଭାଗରେ ସର୍ବାଧିକ ୨ ଲକ୍ଷ ୨୩ ହଜାର ୫୭୫ ଛାତ୍ରଛାତ୍ରୀଙ୍କୁ ଡକାଯାଇଥିବା ବେଳେ ବିଜ୍ଞାନରେ ୮୪ ହଜାର ୭୮୯, ବାଣିଜ୍ୟରେ ୨୫ ହଜାର ୬୨ ଜଣ, ସଂସ୍କୃତରେ ୮୪୩୮ ଓ ଧନ୍ଦାମୂଳକ ବିଭାଗରେ ୫୭୬୨ ଜଣ ରହିଛନ୍ତି । ସେପ୍ଟେମ୍ବର ୨୬ ପର୍ଯ୍ୟନ୍ତ ଚାଲିବାକୁ ଥିବା ଏହି ପର୍ଯ୍ୟାୟ ନାମଲେଖା ସମୟରେ କୋଭିଡ୍-୧୯ ଗାଇଡଲାଇନ ପାଳନ କରିବାକୁ କଲେଜଗୁଡ଼ିକୁ ନିର୍ଦେଶ ଦିଆଯାଇଛି। କଲେଜ କ୍ୟାମ୍ପସର ପ୍ରବେଶ ପଥରେ ପାଣି, ହ୍ୟାଣ୍ଡୱାସ୍, ସାନିଟାଇଜର ଓ ଥର୍ମାଲ ସ୍କ୍ରିନିଂ ବ୍ୟବସ୍ଥା ବାଧ୍ୟତାମୂଳକ ହୋଇଛି। ମାସ୍କ ବ୍ୟବହାର ଓ ସାମାଜିକ ଦୂରତା ରଖିବାକୁ ବି ପରାମର୍ଶ ଦିଆଯାଇଛି। ନାମଲେଖା କେନ୍ଦ୍ରର ସମସ୍ତ ସଦସ୍ୟ ମାସ୍କ ପିନ୍ଧିବା ସହ ୬ ଫୁଟ ଦୂରତା ରକ୍ଷା କରିବେ। ନାମ ଲେଖାଇବାକୁ ଆସୁଥିବା ଛାତ୍ରଛାତ୍ରୀଙ୍କ ସହ ଜଣେ ମାତ୍ର ଅଭିଭାବକ ଆସିପାରିବେ। କଲେଜଗୁଡ଼ିକ ଦୁଇଟି ପର୍ଯ୍ୟାୟ ଯଥା ସକାଳ ୯ଟା ଅପରାହ୍ନ ୧ଟା ଓ ଅପରାହ୍ନ ୧ଟା ୩୦ରୁ ୫ଟା ପର୍ଯ୍ୟନ୍ତ କର୍ମଚାରୀଙ୍କୁ ନିୟୋଜିତ କରିବାକୁ କୁହାଯାଇଛି। ଇଣ୍ଟିମେସନ ଲେଟରରେ କୋଭିଡ୍-୧୯ ସମ୍ପର୍କିତ ତଥ୍ୟ, ନାମଲେଖା ସମ୍ପର୍କିତ ଡକ୍ୟୁମେଣ୍ଟ ଆଣିବାକୁ ଛାତ୍ରଛାତ୍ରୀଙ୍କୁ କୁହାଯାଇଛି। ପ୍ରତି ଘଣ୍ଟାରେ ଅତି ବେଶିରେ ବିଭାଗ ପିଛା ୧୫ ଜଣ ପ୍ରାର୍ଥୀଙ୍କୁ ନାମ ଲେଖାଇବାକୁ ସୁଯୋଗ ଦିଆଯିବ। ୯ଟାରୁ ୫ଟା ପର୍ଯ୍ୟନ୍ତ ନାମଲେଖା ହେବ। ଯେଉଁମାନେ ନିର୍ଦ୍ଧାରିତ ସମୟରେ ନାମଲେଖାଇ ପାରିବେ ନାହିଁ ସେମାନଙ୍କୁ ଅପରାହ୍ନ ୪ଟାରୁ ୫ଟା ମଧ୍ୟରେ ସୁଯୋଗ ଦିଆଯିବ। ପ୍ରତିଦିନ ନାମଲେଖା ସମ୍ପର୍କିତ ତଥ୍ୟ ଅପଡେଟ୍ କରିବାକୁ ଯୁକ୍ତ୨ କଲେଜଗୁଡ଼ିକୁ ନିର୍ଦେଶ ଦିଆଯାଇଛି।