କୋଭିଡ-୧୯ ପରିଚାଳନା ପାଇଁ କେନ୍ଦ୍ରର ଆୟୁର୍ବେଦ ପ୍ରୋଟକଲ୍ ଜାରି

ନୂଆଦିଲ୍ଲୀ: ଆୟୁର୍ବେଦ ଏବଂ ଯୋଗ ମାଧ୍ୟମରେ ମହାମାରୀ କରୋନା ଭାଇରସକୁ ନିୟନ୍ତ୍ରଣ କରିବାକୁ କେନ୍ଦ୍ର ସରକାର ଏକ ପ୍ରୋଟକଲ୍ ଜାରି କରିଛନ୍ତି । ପାରମ୍ପରିକ ପଦ୍ଧତି ମାଧ୍ୟମରେ କୋଭିଡ-୧୯ର ସାମ୍ନା କରି ହେବ ବୋଲି ସରକାର ସୂଚନା ଦେଇଛନ୍ତି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଓ ଆୟୁଷ ମନ୍ତ୍ରାଳୟ ଦ୍ୱାରା ପ୍ରକାଶିତ ଜାତୀୟ କ୍ଲିନିକାଲ୍ ମ୍ୟାନେଜମେଣ୍ଟ ପ୍ରୋଟୋକଲରେ ଏନେଇ ସୂଚନା ଦିଆଯାଇଛି । ଦେଶର ବିଭିନ୍ନ ପ୍ରାନ୍ତରୁ ମିଳିଥିବା ଅଭିଜ୍ଞତା ଆଧାରରେ କରୋନା ମୁକାବିଲା ପାଇଁ ଆୟୁର୍ବେଦ ଓ ଯୋଗ ଏକ ପ୍ରମୁଖ ଭୂମିକା ଗ୍ରହଣ କରିପାରିବ ବୋଲି ସରକାରୀ ବିବୃତିରେ କୁହାଯାଇଛି ।
ଆୟୁଷ ରିସର୍ଚ ଏବଂ ଡେଭ୍ଲପମେଣ୍ଟ୍ ଟାସ୍କ ଫୋର୍ସର ସୁପାରିସ ଆଧାରରେ ପ୍ରସ୍ତୁତ ଏହି ପ୍ରୋଟୋକଲ୍ରେ ଗଳା ଯନ୍ତ୍ରଣା, ଥକାପଣ, ନିଶ୍ୱାସ ପ୍ରଶ୍ୱାସରେ କଷ୍ଟ, ହାଇପୋକ୍ସିଆ, ଜ୍ୱର, ମୁଣ୍ଡବିନ୍ଧା ଇତ୍ୟାଦି କୋଭିଡ -୧୯ ଲକ୍ଷଣର ପ୍ରତିକାର ପାଇଁ ପରାମର୍ଶ ଦିଆଯାଇଛି। ଏହି ସବୁ ସମସ୍ୟା ପାଇଁ ଜାରି ପ୍ରୋଟକଲ୍ରେ ଅଶ୍ବଗନ୍ଧା, ଚ୍ୟବନପ୍ରାଶ, ନାଗରାଡି କାଶାୟା, ସିତୋପଲାଦି ଚୂର୍ଣ୍ଣ, ଭୋଶାଦି ଭାଟୀ ଆଦି ଗ୍ରହଣ କରିବାକୁ କୁହାଯାଇଛି। କେବଳ ଏତିକି ନୁହେଁ, ଏଥିରେ ରହିଛି ଏକ ଯୋଗ ରୁଟିନ୍। କରୋନା ଲକ୍ଷଣ ଦେଖିବା ମାତ୍ରେ ଯୋଗ କରି ତୁରନ୍ତ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାକୁ ପରାମର୍ଶ ଦିଆଯାଇଛି।
ଏହି ପ୍ରୋଟୋକଲ୍ କୋଭିଡ୍ -୧୯ର ପରିଚାଳନା ପାଇଁ ଆୟୁଷ ସମାଧାନର ମୁଖ୍ୟ ସ୍ରୋତରେ ସହାୟକ ହେବ ବୋଲି ଆଶା କରାଯାଉଛି ଏବଂ ଏହି ସମାଧାନଗୁଡିକ ସହଜରେ ଉପଲବ୍ଧ ହୋଇଥିବାରୁ ଏହା ମହାମାରୀ ଦ୍ବାରା ଉପୁଜୁଥିବା ଅସୁବିଧାକୁ ଦୂର କରିବାରେ ସାହାଯ୍ୟ କରିବ ବୋଲି ବିଶ୍ବାସ କରାଯାଉଛି।